យោងតាមរូបថតដែលគេប្រទះឃើញថ្មីៗនេះឲ្យដឹងថាស្រ្តីម្នាក់ក្នុងចំណោមស្រ្តីដែលគេចោទប្រកាន់ថាបានធ្វើឃាតលោក គីម ជុងណាម នោះគឺជាអ្នកចម្រៀងចង្វាក់ប៉ុបមួយរូប។
ស្រ្តីរូបនោះមានឈ្មោះថា Doan Thi Huong ដែលនាងមានវ័យ ២៨ ឆ្នាំ និង មានសញ្ជាតិវៀតណាម។ Doan Thi Huong ត្រូវបានគេឲ្យរហស្សនាមថា "ឃាតក LOL" ដោយសារនៅថ្ងៃធ្វើឃាតលោក គីម ជុងណាម នាងបានពាក់អាវយឹតមានពាក្យថា "LOL"។ អ្នកស៊ើបអង្កេតបានប្រទះឃើញគណនី Facebook ជាច្រើនដែលជាប់ទាក់ទងនឹងឃាតកស្រីរូបនេះ និងបានរកឃើញថានាងបានពាក់អាវដូចគ្នានៅលើ Post មួយដែលអាប់ឡូដដោយគណនីនាងផ្ទាល់ មុនការធ្វើឃាតបួននថ្ងៃ។
ការប្រទះឃើញគណនី Facebook របស់ Doan Thi Huong ថ្មីៗនេះដែរបានបង្ហាញថានាងពិតជាចាប់អារម្មណ៍នឹងវប្បធម៍ជនជាតិកូរ៉េខ្លាំង ហើយមិត្តភក្តិភាគច្រើនដែលទាក់ទងនាងលើ Facebook សុទ្ធតែជាជនជាតិកូរ៉េ។ គណនីដែលមានឈ្មោះថា "Ruby Ruby" បច្ចុប្បន្នមានមិត្តភក្តិតែ ៥៤ នាក់ប៉ុណ្ណោះ ហើយគេឃើញថានាងតែងប្រើពាក្យ “ㅋㅋㅋㅋ” (មានន័យថា haha ឬ LOL) លើផុសរបស់នាងទៀតផង។
យោងតាមសមត្ថកិច្ចម៉ាឡេស៊ីឲ្យដឹងថា "Ruby Ruby" ធ្លាប់បានធ្វើការពាក់ព័ន្ធវិស័យកម្សាន្ត មុននឹងការធ្វើការលោក គីម ជុងណាម ប៉ុន្តែគេមិនបានបញ្ចេញព័ត៌មានជាក់លាក់ពីចំណុចនេះឡើយ។ តាមពិតទៅឃាតកស្រីនេះធ្លាប់ចូលប្រលងក្នុងកម្មវិធីទូរទស្សន៍ "Vietnam Idol" កាលពីឆ្នាំមុន ប៉ុន្តែបានធ្លាក់នៅវគ្គជម្រុះជុំដំបូង។
រំលឹកថា Doan Thi Huong ធ្លាប់បានសារភាពប្រាប់ប៉ូលិសម៉ាឡេស៊ីថា ការធ្វើឃាតនេះជារឿងលេងសើច (Prank) ដែលបង្កើតឡើងដោយមិត្តភ័ក្ដិប៉ុណ្ណោះ ព្រោះខ្លួនគ្មានចេតនាសម្លាប់ជនរងគ្រោះឡើយ៕
